వంద సంవత్సరాల క్రితం, 1915 జూలైలో, పరమహంస యోగానందగారు భారతదేశంలోని శ్రీరాంపూర్‌లో తన గురువైన స్వామి శ్రీయుక్తేశ్వర్ గారి నుండి సన్యాస దీక్షను స్వీకరించడం ద్వారా ఆయన భారతదేశపు ప్రాచీన సన్యాసుల పరంపరలో భాగస్వాములయ్యారు. ఈ సంఘటన ఇరవై రెండేళ్ళ ముకుంద లాల్ ఘోష్ జీవితంలో ఒక మలుపు మాత్రమే కాదు, ఆ సమయంలో ఆయన స్వామి యోగానందగిరిగా మారారు. ఆ పరిణామం 20వ శతాబ్దంలో ప్రపంచ ఆధ్యాత్మికతపై అద్భుతమైన ప్రభావాన్ని చూపింది. ఆయన తన సన్యాస వారసత్వ నిర్మాణంలో భాగంగా స్థాపించిన సన్యాసుల సంప్రదాయం కారణంగానైనా దానిని ఒక అద్భుతమైన మలుపుగానే పరిగణించాలి.
ఈ రోజు యోగదా సత్సంగ సొసైటీ ఆఫ్ ఇండియా భారతదేశంలోని వివిధ ప్రాంతాల నుండి వచ్చిన సన్యాస సమూహాలతో పరమహంస యోగానందగారి సన్యాస పరంపర వర్ధిల్లుతోంది. ఈ సన్యాస పరంపర వై.ఎస్.ఎస్. యొక్క వృద్ధిని సుస్థిరం చేసింది. భారత ఉపఖండంలో యోగా యొక్క విస్తృత వ్యాప్తికి అది దోహదపడుతోంది.
(మధ్యలో మాట్లాడుతున్నవారు).
"నేను స్వామి పరంపరలోని సన్యాసిగా మారాను"
శ్రీ పరమహంస యోగానంద
“గురువుగారూ, నేను బెంగాల్-నాగ‌పూర్ రైల్వేలో ఎగ్జిక్యూటివ్ పదవిని స్వీకరించాలని మా నాన్న చాలా తీవ్రంగా కోరుకుంటున్నారు. కానీ నేను దానిని గట్టిగా తిరస్కరించాను.” నేను ఆశగా, “అయ్యా, మీరు నన్ను స్వామి పరంపరలోని సన్యాసిని చేయరా?” అని నేను నా గురువు [స్వామి శ్రీయుక్తేశ్వర్ గారి] వైపు అభ్యర్థనగా చూస్తూ విన్నవించుకున్నాను. గతంలో, నా సంకల్పం యొక్క లోతును పరీక్షించడానికి, ఇదే అభ్యర్థనను తిరస్కరించిన మా గురువుగారు ఈరోజు దయగా నవ్వారు.
“మంచిది, రేపు నేను నీకు సన్యాస దీక్ష ఇస్తాను.” అని ఆయన నిశ్శబ్దంగా వెళ్ళిపోయారు, “నువ్వు సన్యాసిగా ఉండాలనే కోరికను కొనసాగించినందుకు నేను సంతోషిస్తున్నాను. లాహిరీ మహాశయులు తరచూ ఇలా అంటారు: ‘మీరు దేవుడిని మీ వేసవి అతిథిగా ఆహ్వానించకపోతే, మీ జీవితంలోని శీతాకాలంలో ఆయన రాడు.’”
“ప్రియమైన గురువుగారూ, పూజ్యులైన మీ వలే సన్యాస పరంపరకు అంకితమవ్వాలనే నా కోరికను నేను ఎప్పటికీ వదులుకోలేను,” అంటూ నేను ఆయనను చూసి ఎనలేని ఆప్యాయతతో నవ్వాను….
పరమహంస యోగానందగారు, చేతులు పైకెత్తి, తన ప్రియమైన శిష్యుడు, జేమ్స్ జె. లిన్ ను ఆశీర్వదించారు. వీరికి ఆయన అప్పుడే సన్యాసం, ప్రసాదించి రాజర్షి జనకానంద నామాన్ని ఇచ్చారు; ఎస్.ఆర్.ఎఫ్./వై.ఎస్.ఎస్. అంతర్జాతీయ ప్రధాన కార్యాలయం, లాస్ ఏంజిలిస్, ఆగస్ట్ 25, 1951.
1970లో, మదర్ సెంటర్ లో స్వామి శ్యామానందకు, శ్రీ దయామాతగారు సన్యాసుల కాషాయ వస్త్రాన్ని కప్పారు.
1925లో లాస్ ఏంజిలిస్ లో సెల్ఫ్-రియలైజేషన్ ఫెలోషిప్ అంతర్జాతీయ ప్రధాన కార్యాలయాన్ని స్థాపించిన తర్వాత, తమ జీవితాలను పూర్తిగా భగవదన్వేషణకు అంకితం చేయాలనే కోరికతో వచ్చిన స్త్రీ పురుషులకు పరమహంసగారు క్రమంగా శిక్షణనివ్వడం ప్రారంభించారు. శ్రీ దయామాతగారు, శ్రీ జ్ఞానమాతగారు, మరియు ఇతర లోతైన అంకితభావం గల ప్రారంభ శిష్యుల రాకతో, కాలిఫోర్నియాలోని లాస్ ఏంజిలిస్ లోని మౌంట్ వాషింగ్టన్ లోని కొండపై ఉన్న ఆశ్రమం క్రమంగా పెరుగుతున్న పరిత్యాగుల నిలయంగా మారింది. వీరిలో ఆయన స్ఫూర్తిని, ఆదర్శాలను నింపారు. తనకు తాను సన్యాసియైన ఆయన, సన్యాస జీవితానికి స్వయంగా ఉదాహరణగా నిలిచారు. తాను ప్రారంభించిన ప్రపంచవ్యాప్త ఆధ్యాత్మిక, మానవతా కార్యాన్ని నిరంతరాయంగా కొనసాగించడానికి, తన బోధనల వ్యాప్తికి ఆయన తన మిషన్ యొక్క భవిష్యత్ బాధ్యతను అప్పగించిన తన సన్నిహిత శిష్యులకు నిర్దిష్ట మార్గదర్శకాలను కూడా ఇచ్చారు. ఈ రోజు, ఆయన తన జీవితకాలంలో ఆశ్రమవాసులకు అందించిన లోతైన ఆధ్యాత్మిక సలహాలు, క్రమశిక్షణ కొత్త తరాల వై.ఎస్.ఎస్. మరియు ఎస్.ఆర్.ఎఫ్. సన్యాసులకు కూడా అందించబడుతున్నాయి.
ఈ విధంగా, పరమహంస యోగానందగారి ద్వారా, భారతదేశంలోని ప్రాచీన సన్యాస పరంపర అమెరికాలో లోతైన, శాశ్వతమైన మూలాలను ఏర్పరచుకుంది. అర్హత కలిగిన పాశ్చాత్యులను ప్రోత్సహించడంతో పాటు, పరమహంసజీ సనాతన సన్యాస సంప్రదాయానికి ఒక నూతన ఒరవడిని సృష్టించారు. పవిత్రమైన సన్యాస దీక్షను, ఆధ్యాత్మిక నాయకత్వాన్ని, అటు మహిళలకు, ఇటు పురుషులకు ఇరువురికీ ఇవ్వడమే ఆయన సమయంలో జరిగిన ఒక అసాధారణమైన పరిణామం. వాస్తవానికి ఆయన, సన్యాస దీక్షను ఇచ్చిన మొదటి ఎస్.ఆర్.ఎఫ్. సన్యాస శిష్యురాలు ఒక మహిళ — శ్రీ దయామాతగారు. ఆ తరువాత అర్ధ శతాబ్దానికి పైగా వై.ఎస్.ఎస్./ఎస్.ఆర్.ఎఫ్. యొక్క ఆధ్యాత్మిక అధిపతిగా ఆమె పనిచేశారు.
శ్రీ దయామాతగారు అధ్యక్షత వహించిన సమయంలో భారతదేశంలోని సన్యాస పరంపరకు చెందిన పీఠాధిపతి — శ్రీ పూరీ శంకరాచార్య స్వామి భారతీ కృష్ణ తీర్థ — 1958లో తన మూడు నెలల అమెరికా పర్యటనలో సెల్ఫ్-రియలైజేషన్ ఫెలోషిప్ కు అతిథిగా ఉన్నారు. భారతదేశ చరిత్రలో శంకరాచార్యులవారు (ఎనిమిదవ శతాబ్దపు సన్యాస పరంపరను పునర్వ్యవస్థీకరించిన ఆదిశంకరుని వారసుడు) పశ్చిమ దేశాలకు ప్రయాణించడం ఇదే మొదటిసారి. జగద్గురు శంకరాచార్యులు శ్రీ దయామాతగారు పట్ల ప్రగాఢమైన గౌరవాన్ని కలిగి ఉన్నారు. బాబాజీ ఆదేశానుసారం పరమహంస యోగానందగారు ప్రారంభించిన వై.ఎస్.ఎస్./ఎస్.ఆర్.ఎఫ్. ఆశ్రమాలలో సన్యాస పరంపరను మరింతగా విస్తరించడానికి ఆమెకు అధికారిక ఆశీర్వాదాన్ని ఇచ్చారు. భారతదేశానికి తిరిగి వచ్చిన తర్వాత, ఆయన బహిరంగంగా ఇలా అన్నారు: “నేను సెల్ఫ్-రియలైజేషన్ ఫెలోషిప్ [యోగదా సత్సంగ సొసైటీ ఆఫ్ ఇండియా]లో అత్యున్నత ఆధ్యాత్మికత, సేవ మరియు ప్రేమను దర్శించాను. వారి ప్రతినిధులు ఈ సూత్రాలను బోధించడమే కాకుండా, వాటిని త్రికరణ శుద్ధిగా ఆచరిస్తారు కూడా.”
పరమహంస యోగానందగారు నిర్దేశించిన కార్యాన్ని కొనసాగించడం
యోగదా సత్సంగ సొసైటీ ఆఫ్ ఇండియా సన్యాసులు వివిధ హోదాల్లో సేవలందిస్తూ పరమహంసజీ యొక్క కార్యాన్ని కొనసాగిస్తున్నారు — భారతదేశం అంతటా వార్షిక బహిరంగ సమావేశ పర్యటనలు, తరగతులను నిర్వహించడం, సత్సంగాలలో ప్రసంగించడం, ఔట్ రీచ్ కార్యక్రమాలలో ప్రజలకు ఆతిథ్యం ఇవ్వడం, ఆఫీసు పని చేయడం, సొసైటీ యొక్క ఆశ్రమాలు, కేంద్రాల నిర్వహణ వంటి వాటితో పాటు ధ్యాన మండళ్ళ నిర్వహణ, వై.ఎస్.ఎస్. పుస్తకాలు, రికార్డింగుల ప్రచురణ, పంపిణీ, వివిధ ఆధ్యాత్మిక విషయాలపై కౌన్సెలింగ్ వంటివాటిని పర్యవేక్షిస్తుంది.
"భగవంతుడే ప్రథముడు, ఎల్లవేళలా భగవంతుడే, కేవలం భగవంతుడే"
శ్రీ మృణాళినీమాత
యోగాదా సత్సంగ సొసైటీ ఆఫ్ ఇండియా/సెల్ఫ్-రియలైజేషన్ ఫెలోషిప్ యొక్క నాల్గవ అధ్యక్షురాలు వై.ఎస్.ఎస్./ఎస్.ఆర్.ఎఫ్. సన్యాసులనుద్దేశించి (2011-2017) చేసిన వ్యాఖ్యల నుండి సంగ్రహాలు
ప్రియతమా,
గత కొన్ని సంవత్సరాలుగా మన గురువుగారి ఆశీస్సులతో సెల్ఫ్-రియలైజేషన్ ఫెలోషిప్ [యోగదా సత్సంగ సొసైటీ ఆఫ్ ఇండియా] వేగంగా వృద్ధి చెందింది. ఈ కార్యం మరో కొత్త శకంలోకి విస్తరిస్తోంది. సన్యాసులుగా జీవితాన్ని అంకితం చేయడానికి వచ్చిన మాతో చాలా సంవత్సరాల క్రితం గురువుగారు మాట్లాడిన మాటలు మేము చాలా తరచుగా గుర్తు చేసుకుంటూ ఉంటాము: “నేను ఈ దేహాన్ని విడిచిపెట్టినప్పుడు, సంస్థే నా దేహం అవుతుంది. మీరందరూ నా చేతులు, కాళ్ళు, నా వాక్కు అవుతారు.” ఈ సమర్పిత జీవితం ఓ మహదవకాశం. అత్యుత్తమ స్వేచ్ఛానుభవం. దానిని హృదయపూర్వకంగా స్వీకరించే ప్రతి ఒక్కరూ ఆ జగదీశ్వరుడైన ప్రభువు యొక్క ప్రకాశించే అణువు అవుతారు. ప్రతి ఒక్కరూ కార్య పూర్తికి అవసరమైన సహకారాన్ని అందిస్తారు. దీని ద్వారా గురుదేవుని సంస్థ ఆ భగవానుని ప్రేమను, దైవిక స్ఫూర్తిని నిరంతరం కొనసాగించవచ్చు.
నేడు ప్రపంచం చాలా ఆధ్యాత్మిక ప్రమాణాలను, నైతికతలను కోల్పోయింది. సన్యాసుల మార్గాన్ని ఎంచుకునే వారు ఆ సాధారణ భౌతిక నిబంధనలకు అతీతమైన జీవితాన్ని గడపాలనే ఆత్మాభీష్టం, సామర్థ్యాలకు ప్రతిస్పందనగా అలా చేస్తారు. అలా వచ్చేవారిలో కొద్దిమంది మాత్రమే సన్యాసాన్ని స్వీకరించినప్పటికీ, క్రమశిక్షణతో కూడిన జీవితాన్ని గడిపి, ఇతరులనేకుల ముందు ఆ ఉన్నత విలువలను, ఆదర్శాలను నిలపడానికి ఉపయోగపడతారు. ప్రజలు దేవునికి మాత్రమే చెందిన భిన్నమైన, ప్రత్యేకమైన జీవిత స్వచ్ఛతను అట్టి వారి నుంచి అనుభూతి చెందుతారు. నిరాడంబరత, విధేయత, పవిత్రత, విశ్వాసం అనే ప్రమాణాలకు కట్టుబడి, ధ్యానంలో పట్టుదలతో చేసే వినయపూర్వకమైన ప్రయత్నం కారణంగా, భక్తునిలో విపరీతమైన మార్పులు వస్తాయి. అతను నివసించే చిన్న కసాయి దుకాణం కూడా ఆధ్యాత్మికతతో శోభిల్లుతుంది. ఇతరులు అది ఏమిటో చెప్పలేరు, కానీ వారు తమను ఉద్ధరించే, తమను భగవంతునికి చేరువచేసే ఒకానొక ప్రకాశం (ఆరా) ఆ భక్తుని వద్ద ఉన్నట్లుగా అనుభూతి చెందుతారు. వినయపూర్వకమైన భక్తుడు దానిని ప్రదర్శించడు. నిజానికి, ఆయనకు దాని గురించి తెలియకపోవచ్చు కూడా.
ఆహ్వానం
కుటుంబ బాధ్యతలు లేని ఒంటరి పురుషులు, సన్యాసాశ్రమాలలో పరిత్యాగిగా భగవంతుని అన్వేషించి, ఆయనను సేవించడంలో తమను తాము అంకితం చేసుకోవాలనే హృదయపూర్వకమైన కోరిక ఉన్నవారు మరింత సమాచారం కోసం రాంచీలోని యోగదా సత్సంగ శాఖ ఆశ్రమాన్ని సంప్రదించగలరు.
