శాశ్వతమైన ఆనందానికి రహస్యాలు

మీరు ఎంత గాఢంగా ధ్యానం చేస్తే, ఎంత ఇష్టపూర్వకంగా సేవ చేస్తే, అంత సంతోషంగా ఉంటారు.

ధ్యానం చేయడం ద్వారా మరియు మీ చైతన్యాన్ని, ఎల్లప్పుడూ ఉనికిలో ఉన్న, ఎల్లప్పుడూ ఎరుక కలిగిన, నిత్య నవీన ఆనందమైన భగవంతునితో అనుశ్రుతిలో ఉంచుకోవడం ద్వారా మీలో ఉన్న ఆనందం యొక్క అన్ని పరిస్థితులను కొనసాగించడం నేర్చుకోండి. మీ ఆనందం ఎప్పుడూ బయటి ప్రభావాలకి లోబడి ఉండకూడదు. మీ వాతావరణం ఏదైనప్పటికీ, మీ అంతర్గత శాంతిని తాకడానికి దానిని అనుమతించవద్దు.

నిజమైన ఆనందం అన్ని బాహ్య అనుభవాల సవాలును ఎదుర్కోగలదు. మీకు వ్యతిరేకంగా ఇతరుల తప్పుల శిలువలను మీరు భరించగలిగినప్పుడు మరియు ఇప్పటికీ ప్రేమ మరియు క్షమాపణలను తిరిగి ఇవ్వగలిగినప్పుడు; మరియు బాహ్య పరిస్థితుల యొక్క అన్ని బాధాకరమైన ఒత్తిళ్లు ఉన్నప్పటికీ మీరు ఆ దైవిక అంతర్గత శాంతిని చెక్కుచెదరకుండా ఉంచగలిగినప్పుడు, మీరు ఈ ఆనందాన్ని తెలుసుకుంటారు.

ప్రతి రాత్రి మీరు నిద్ర పోవడానికి ముందు మరియు ఉదయం మళ్ళీ దైనందిన కార్యకలాపాలను ప్రారంభించే ముందు కనీసం అరగంట పాటు వీలైతే ఇంకా ఎక్కువసేపు మౌనంగా మరియు ప్రశాంతంగా [ధ్యానంలో] ఉండండి. దైనందిన జీవితంలో జరిగే యుద్ధంలో ఎదురయ్యే అన్ని క్లిష్ట పరిస్థితులను మీరు ఎదుర్కొనేలా చేసే ఆనందం యొక్క నిస్సంకోచమైన, విడదీయరాని అంతర్గత అలవాటును ఇది కలిగజేస్తుంది. ఈ విధమైన మార్పులేని అంతర్గత ఆనందంతో, మీ దైనందిన అవసరాలను నెరవేర్చుకోవడానికి ముందుకు సాగండి.

ఆనందం కోసం బయట ఉన్న పరిస్థితులపై మీరు ఎంత ఎక్కువగా ఆధారపడతారో, అంత తక్కువగా ఆనందాన్ని మీరు అనుభవిస్తారు.

మీరు భగవంతుడిని మరచిపోయి సంతోషంగా జీవించగలరని అనుకుంటే, మీరు పొరపాటుపడ్డట్లే, ఎందుకంటే మీరు విశ్వంలో ఉన్న ఏకైక వాస్తవికతలో భగవంతుడు మాత్రమే ఉన్నాడని గ్రహించే వరకు మీరు ఒంటరితనంలో పదే పదే దుఃఖిస్తారు. మీరు ఆయన స్వరూపంలోనే తయారయ్యారు. భగవంతుడు తప్ప ఏదీ సంపూర్ణం కాదు, కాబట్టి మీరు ఏ విషయంలోనూ శాశ్వతమైన ఆనందాన్ని పొందలేరు.

ప్రభువుతో అనుసంధానంలో నేను పొందిన అపరిమితమైన ఆనందాన్ని ఏ పదాలు వర్ణించలేవు. రాత్రింబగళ్లు ఆ ఆనందకర స్థితిలో ఉన్నాను. ఆ ఆనందమే భగవంతుడు. ఆయనను తెలుసుకోవడమంటే మీ బాధలన్నిటికీ అంత్యక్రియలు చేయడమే. మీరు దిగులుగా మరియు విచారగ్రస్తుడుగా ఉండాలని ఆయన ఆశించడు. ఇది దేవునికి సంబంధించిన సరైన భావన కాదు, ఆయనను సంతోషపెట్టే మార్గం ఇది కాదు. సంతోషంగా లేకుండా మీరు ఆయనను కనుగొనలేరు….మీరు ఎంత సంతోషంగా ఉంటే, ఆయనతో మీ అనుసంధానం అంత గొప్పగా ఉంటుంది. ఆయనను తెలిసుకున్నవారు ఎల్లప్పుడూ ఆనందంగా ఉంటారు, ఎందుకంటే భగవంతుడే ఆనంద స్వరూపుడు.