ప్రపంచమంతటా క్రియాయోగ బీజాలు నాటడం

గురువుగారు తన నుదురును నా నుదురుకు ఎదురుగా పెట్టారు. నా కళ్ళుపైకెత్తి కనుబొమల మధ్య కేంద్ర బిందువును చూడమన్నారు, నేనలాగే చేశాను. అక్కడ నేను ఆధ్యాత్మిక నేత్రం యొక్క గొప్ప కాంతిని దర్శించాను. నాకు ఏమి కనిపిస్తుందో గురువు గారు ముందు గా నాకు సూచన ఇవ్వలేదు. అలా సూచన ఇవ్వడం ద్వారా ఆయన నన్ను ఏవిధంగానూ ప్రభావితం చేయలేదు. నేను దర్శించినది నాకు సహజంగానే సంభవించింది.

“నేను సంపూర్ణ చైతన్యంతో, సంపూర్ణ జాగృతిలో, సంపూర్ణ అప్రమత్తతతో ఉన్నాను. గురువుగారు నా మానసిక తరంగాలను నిలకడగా అయేటట్టు చేసి నా ఆత్మ యొక్క సహజావబోధం వల్ల నాకీ దర్శనం అయేలా తోడ్పడ్డారు. నేను ఆ గొప్ప బంగారు కాంతి లోకి ఇంకా చూసేకొద్దీ మొత్తం ఆధ్యాత్మిక నేత్రం రూపొందింది. దానిలోపలి ముదురు నీలి రంగు భాగం నాలోని కూటస్థ చైతన్యానికి ప్రాతినిధ్యం వహిస్తుండగా, చివరిగా తెల్లని చిన్ని వెండి నక్షత్రం విశ్వ చైతన్యానికి సంగ్రహ రూపంగా నిలిచింది.

“మనలో ప్రతి ఒక్కరిలోను ఉన్న ఆ అంతరిక వాస్తవాన్ని నాకు దర్శింపజేయ గలిగిన ఒక్కరిని కనుగొనగలిగినందుకు నేను పరమానందభరితుడినయాను. ఆయన సాధారణ వ్యక్తి కాదనీ, ఆధ్యాత్మిక విషయాలు తమకు తెలుసునని ప్రకటించుకొనే మామూలు మనుషులకు, ఈయన పూర్తిగా వేరు అని గ్రహించాను. “మేము కొద్ది నిముషాలు మాట్లాడుకొన్నాము, ఆ తరువాత ఆయన మరొకసారి తన నుదురును, నా నుదురుకు అదిమిపెట్టారు; అప్పుడు నాకు దర్శన మయింది, వేయి రేకుల పద్మం యొక్క ప్రకాశం [మెదడు పైభాగంలో ఉండే అత్యున్నత అధ్యాత్మిక కేంద్రం]—తన అనేకానేక వెండి రేకుల కిరణాలతో కనిపించే అత్యద్భుత దర్శనం. అలా నేను చూస్తుండగా రక్త నాళాల్లో చిన్ని చిన్ని వెలుగు మెరుపులు ఊగుతూ ముందుకుపోయేటపుడు రక్తనాళాల గోడలకు తగులుతూ, నా కళ్లముందు సాగిపోతున్నాయి. ఇవి రక్త కణాలు, ఈశ్వరుడి ఈ కాంతి నాటకంలో తన పాత్రను పోషిస్తూ వాటిలో ప్రతి ఒకటీ తనలోని సూక్ష్మ కాంతిని వ్యక్తపరుస్తోంది చేస్తోంది.

“పరమహంసగారు ఈశ్వరుడి ఆ గొప్ప కాంతిని నాకు చూపించి, ఇలా అన్నారు: నీవు ఈ మార్గానికి బద్ధుడవై, క్రమం తప్పకుండా ధ్యానం చేసినట్టయితే ఈ దర్శనం ఎప్పటికీ నీదే అవుతుంది ‘ అందువల్ల నేను ఆయన సలహా పాటించాను. నేనెప్పుడూ నా క్రియాయోగ సాధన మానలేదు. క్రమేపీ భగవంతుడి ప్రకాశం నాలో ప్రవేశించింది. నాకేది లభించిందో అది గురువుగారినుండి లభించింది. ఆయన నన్ను భ్రాంతి యొక్క అనిశ్చితి నుండి, వాస్తవికత అనే వెలుగులోకి లేవనెత్తారు. ఆ అనుభవం వచ్చినపుడు అది హృదయాన్ని మారుస్తుంది. అప్పుడు మనం మానవులందరి సహోదరత్వాన్ని, ఈశ్వరుడి పితృత్వాన్ని వాస్తవంగా అనుభూతి చెందుతాము.”